Avropada qar örtüyü son 20 ilin ən yüksək göstəricilərindən birinə çatıb

2026-cı ilin yanvarın əvvəlində Avropada qar örtüyünün sahəsi təxminən 7,8 milyon kvadrat kilometrə çatıb ki, bu da qitə ərazisinin təxminən 70%-ni təşkil edir.

Peyk müşahidələri Avropada qar örtüyünün son illərlə müqayisədə qeyri-adi dərəcədə geniş olduğunu göstərir. Qar örtüyünün ən böyük sahələri Şimali, Mərkəzi və Şərqi Avropada qeydə alınıb. Bu ərazilərdə demək olar ki, Skandinaviya ölkələri, Baltikyanı dövlətlər, Şərqi Avropa və Rusiyanın böyük hissəsi tam şəkildə qarla örtülüb.

Məlumata əsasən, Alp dağları, Karpat və Balkanlar da daxil olmaqla, Mərkəzi və Cənub-Şərqi Avropanın dağlıq zonalarında da geniş qar örtüyü müşahidə olunur.

Bununla yanaşı, qitənin cənub-qərb və cənub bölgələrində – o cümlədən qərbi Fransa, İspaniyanın böyük hissəsi, İtaliya və Yunanıstanda qar örtüyü əsasən formalaşmayıb.

2018-ci ildən bəri aparılan müqayisəli arxiv məlumatlarına görə, hazırkı göstərici son illərdə Avropada qeydə alınan ən yüksək qar örtüyü sahəsidir. Qar örtüyünün bundan daha geniş olduğu dövrlər yalnız 2009 və 2010-cu illərdə, eləcə də oxşar səviyyələr 2017-ci ildə müşahidə olunub.

 2026-cı ilin yanvarındakı mövcud qar örtüyü son 20 il ərzində dördüncü ən yüksək göstərici kimi qiymətləndirilir.

Aytac