"X" sosial şəbəkəsinin Parisdəki ofislərində axtarışlar aparılır

Paris prokurorluğunun kibercinayətkarlıqla mübarizə şöbəsi Elon Maskın sahibi olduğu “X” sosial şəbəkəsinin Fransadakı ofislərində axtarış aparıb.

Prokurorluğun məlumatına görə, axtarış Europol-un dəstəyi ilə həyata keçirilib və “X” platforması və ya onun rəhbərliyi tərəfindən alqoritmlərdən mümkün sui-istifadə və məlumat toplama ilə bağlı fırıldaqçılıq iddiaları üzrə aparılan bir illik istintaq çərçivəsində həyata keçirilib.

Paris prokurorluğu bildirib ki, istintaq “X” platformasının süni intellekt əsaslı çatbotu Grok ilə bağlı daxil olmuş şikayətləri də əhatə edəcək şəkildə genişləndirilib. Məlumata əsasən, Elon Mask və “X” platformasının keçmiş baş direktoru Linda Yakkarino aprel ayında keçirilməsi planlaşdırılan dinləmələrə istintaq çərçivəsində çağırılıblar.

Prokurorluq vurğulayıb ki, araşdırma konstruktiv şəkildə aparılır və məqsəd “X” platformasının Fransada fəaliyyət göstərdiyi müddətdə milli qanunvericiliyə uyğunluğunu təmin etməkdir.

“X” platforması məsələ ilə bağlı dərhal şərh verməyib. Şirkət daha əvvəl alqoritmlərinin manipulyasiyası ilə bağlı iddiaları rədd edərək, platformanın fəaliyyətinin qanunvericiliyə uyğun olduğunu bildirib.

Aytac