Çində fişəng zavodunda partlayış -Prezident təcili göstəriş verib

Çinin Hunan əyalətində fişəng zavodunda baş verən partlayış nəticəsində azı 21 nəfər ölüb, 61 nəfər yaralanıb.

Hadisə mayın 4-də Pekin vaxtı ilə saat 16:43 radələrində Hunan əyalətinin Liuyanq şəhərində yerləşən zavodda baş verib.

Liuyanq Çinin əsas fişəng istehsalı mərkəzlərindən biri sayılır.

Çin dövlət mediasının məlumatına görə, hadisə yerində yüzlərlə xilasedici işləyir. Zavod ərazisində iki barıt anbarının hələ də yüksək risk yaratdığı bildirilir. Buna görə ərazidə bir kilometrlik əsas əməliyyat zonası və üç kilometrlik nəzarət zonası yaradılıb, yaxınlıqda yaşayan sakinlər təhlükəsiz ərazilərə təxliyə olunub.

Çin Prezidenti Si Cinpin yaralıların müalicəsi, itkin düşənlərin axtarışı, hadisənin səbəblərinin tezliklə müəyyənləşdirilməsi və məsul şəxslərin ciddi şəkildə cəzalandırılması barədə göstəriş verib.

Yaralılar xəstəxanalara yerləşdirilib. Polis zavoda sahib olan şirkətin rəhbər şəxsləri barəsində tədbir görüb.

Hadisənin səbəbləri araşdırılır.

Gülnar Nazimqızı