Rusiya Ermənistanı xəyanət etməkdə ittiham edir

Rusiya Federasiya Şurasının üzvü Konstantin Kosaçev Ermənistan hakimiyyətini Moskva ilə münasibətlərdə “xəyanətdə” ittiham edib və bunu Rusiya üçün “vacib dərs” adlandırıb.

Senator öz Telegram kanalında yazıb ki, Ermənistan Gömrük İttifaqına qoşularkən bu qərarın əleyhdarları cəmiyyətin cəmi 5%-ni təşkil edirdi, lakin onların mövqeyi Qərb tərəfindən maliyyələşdirilən yüzlərlə təşkilat vasitəsilə dəstəklənirdi.

Onun sözlərinə görə, bu qüvvələr media və onlayn platformalarda da geniş təmsil olunurdu.

Kosaçev bildirib ki, inteqrasiyanı dəstəkləyən qüvvələr daha az resursa malik olub və nəticədə “uzun müddət yığılan ziddiyyətlərin partlaması qaçılmaz idi”.

O, həmçinin Ermənistanın hazırkı siyasi kursunu tənqid edərək qeyd edib ki, Nikol Paşinyan və onun siyasi komandası Qərbyönlü siyasəti əvvəlcədən hazırlanmış “təlimatlar” əsasında həyata keçirir.
Bu açıqlamalar Avropa Siyasi Birliyinin sammiti çərçivəsində İrəvanda keçirilən görüşlər fonunda səslənib.

Sammitdə Ermənistanın Avropa İttifaqı ilə münasibətlərinin dərinləşdirilməsi müzakirə olunub.
Paşinyan mayın 5-də ölkəsinin Avropa İttifaqına inteqrasiya kursuna sadiq olduğunu bildirib və Ukrayna prezidenti Volodimir Zelenski ilə görüş keçirib.

Eyni zamanda, Fransa prezidenti Emmanuel Makron Ermənistanın artıq Rusiyanın təsir dairəsində olmadığını deyərək, İrəvanın Avropaya inteqrasiya istiqamətində addımlarını müsbət qiymətləndirib.

Hadisələr fonunda regionda geosiyasi balansın dəyişməsi ilə bağlı müzakirələr güclənməkdə davam edir.

Aytac