Ağ Ev yaxınlığında atəş açan şəxs xəstəxanada ölüb - Yenilənib

Ağ Evin təhlükəsizlik yoxlama məntəqəsi yaxınlığında atəş açan şübhəli şəxs ABŞ Gizli Xidmət əməkdaşlarının cavab atəşindən sonra xəstəxanaya çatdırılıb, lakin onun həyatını xilas etmək mümkün olmayıb.Bu barədə “CNN” ABŞ Gizli Xidmətinin açıqlamasına istinadən məlumat yayıb.

***

Vaşinqtonda Ağ Ev yaxınlığında atışma baş verib, ABŞ Məxfi Xidməti jurnalistləri müvəqqəti təxliyə edib və təhlükəsizlik tədbirlərini gücləndirib.Bu barədə ABŞ mediası məlumat yayıb.

“CNN”in məlumatına görə, Məxfi Xidmət XVII küçə ilə Pensilvaniya prospektinin kəsişməsində atışma barədə xəbərləri araşdırıb. Hadisədən sonra Ağ Ev ətrafında silahlı agentlər yerləşdirilib, mətbuat brifinqi otağı isə müvəqqəti bağlanıb.

“DC News Now”un müxbiri Kris Flanaqan hadisə zamanı ABŞ Prezidenti Donald Trumpın Ağ Evdə olduğunu bildirib.

Daha sonra “PBS” müxbir Liz Landerə istinadən prezidentin xəsarət almadığını və təhlükəsiz olduğunu açıqlayıb.

“Fox News”un məlumatına görə, insident nəzarətə götürülüb və silahlı şəxs zərərsizləşdirilib. Kanal qeyd edib ki, şübhəli şəxs prezident iqamətgahının qorunan hissəsinə daxil ola bilməyib və yalnız perimetrə yaxınlaşıb.

Məlumata əsasən, atışma zamanı iki nəfər – silahlı şəxs və ətrafda olan bir nəfər yaralanıb.

ABŞ Federal Təhqiqat Bürosunun direktoru Keş Patel bildirib ki, FTB əməkdaşları hadisə yerinə cəlb olunub və Məxfi Xidmətə dəstək verir. O əlavə edib ki, yeni məlumatlar əldə olunduqca ictimaiyyətə açıqlama veriləcək.