Ermənistanda seçki müşahidəçisi səsvermənin gizliliyini pozmaq şübhəsi ilə saxlanılıb

Ermənistanda keçirilən parlament seçkiləri zamanı səsvermənin gizliliyini pozmaqda şübhəli bilinən müxalifət koalisiyasının nümayəndəsi saxlanılıb.Bu barədə Ermənistan İstintaq Komitəsinin məlumat yayıb.

Hadisə bu gün səhər saat 08:15-də qeydə alınıb. Məlumata əsasən, seçici H.X. səsvermə bülletenlərini aldıqdan sonra kabinəyə daxil olub, lakin daha sonra səsvermə talonunu komissiya üzvünə təqdim etməyərək onu kabinədə unutduğunu bildirib.

Bundan sonra seçki komissiyasının qərarı ilə məntəqə sədri talonu yoxlamaq üçün səsvermə kabinəsinə daxil olub. İstintaq Komitəsinin bildirdiyinə görə, həmin vaxt müxalif “Güclü Ermənistan” blokunun müşahidəçisi S.T. istifadə olunmamış bülletenlər üçün nəzərdə tutulmuş qutunu və bülletenləri videoya çəkib.

Qurumun açıqlamasında qeyd olunub ki, S.T. cinayət törətməsinə dair əsaslı şübhələr əsasında polis əməkdaşları tərəfindən saxlanılıb.

Faktla bağlı Ermənistan Cinayət Məcəlləsinin səsvermənin gizliliyinin pozulmasını nəzərdə tutan 215.2-ci maddəsi ilə cinayət işi başlanıb.