ABŞ, Fransa və Yunanıstan hərbçiləri Ermənistana səfər edəcək

Ermənistan iyunun 17-25-də ABŞ ilə birgə keçiriləcək illik "Eagle Partner 2026" hərbi təlimlərinə ev sahibliyi edəcək.Bu barədə Ermənistan Müdafiə Nazirliyi məlumat yayıb.

Nazirliyin məlumatına görə, təlimlər beynəlxalq sülhməramlı missiyalarda iştiraka hazırlıq məqsədilə təşkil olunur. Təlimlərdə Ermənistan Silahlı Qüvvələrinin sülhməramlı briqadasının 250 hərbçisi, ABŞ Ordusunun Avropa və Afrika komandanlığının, eləcə də Kanzas Milli Qvardiyasının 58 hərbçisi iştirak edəcək. Bundan başqa, Fransadan 24, Yunanıstandan isə 11 hərbçi təlimlərə qatılacaq.

Təlimlər çərçivəsində sülhməramlı əməliyyatlar üzrə tapşırıqlar icra olunacaq. Ermənistan Müdafiə Nazirliyi bildirib ki, məqsəd beynəlxalq missiyalarda iştirak edən bölmələr arasında qarşılıqlı fəaliyyətin gücləndirilməsi, komandanlıq, nəzarət və taktiki rabitə sahələrində təcrübə mübadiləsinin aparılması, həmçinin ölkənin sülhməramlı qüvvələrinin hazırlıq səviyyəsinin artırılmasıdır.