Ərdoğan Sinqapurun Baş naziri ilə regional məsələləri müzakirə edib

Türkiyə Prezidenti Rəcəb Tayyib Ərdoğan Sinqapurun Baş naziri Lourens Vonq ilə Ankarada görüşüb.

Türkiyə Prezident Administrasiyasının Kommunikasiya İdarəsinin məlumatına görə, tərəflər Türkiyə-Sinqapur münasibətlərini, eləcə də regional və beynəlxalq gündəmdəki məsələləri müzakirə ediblər.

Ərdoğan iki ölkə arasında əməkdaşlığın genişləndirilməsinin vacibliyini vurğulayıb. Onun sözlərinə görə, müdafiə sənayesi, logistika, aviasiya, dənizçilik və maliyyə sahələrində əlaqələrin inkişafı istiqamətində işlər davam etdiriləcək.

Türkiyə lideri həmçinin bildirib ki, Ankara İran və ABŞ arasında davamlı sülhün təmin olunması məqsədilə diplomatik səylərini davam etdirir.

Ərdoğan Hörmüz boğazında gəmiçilik və naviqasiya azadlığının qorunmasının vacibliyini qeyd edərək, Türkiyənin tərəfdaş ölkələrlə birlikdə bu prosesə töhfə verməyə hazır olduğunu bildirib.