Ərdoğan və Pezeşkian ABŞ-İran razılaşmasını müzakirə ediblər

Türkiyə Prezidenti Rəcəb Tayyib Ərdoğan İran Prezidenti Məsud Pezeşkianla telefon danışığı aparıb.Bu barədə Türkiyə Prezident Administrasiyasının Kommunikasiya İdarəsinin “X” hesabında məlumat paylaşılıb.

Telefon danışığı zamanı Türkiyə-İran ikitərəfli münasibətləri, eləcə də regional və qlobal gündəmdəki məsələlər müzakirə olunub.

Ərdoğan İranla ABŞ arasında əldə olunan razılaşmanı müsbət qiymətləndirdiyini bildirib. O, Türkiyənin prosesin sülh yolu ilə nəticələnməsi üçün bütün mümkün dəstəyi göstərməyə hazır olduğunu vurğulayıb.

Türkiyə Prezidenti həmçinin danışıqlar prosesini pozmağa cəhd edən qüvvələrə qarşı diqqətli olunmasının vacibliyini qeyd edib.

Ərdoğan regional sülh və sabitliyin möhkəmləndirilməsi istiqamətində addımların davam etdirilməsinin əhəmiyyətini vurğulayaraq, Ankaranın bu istiqamətdə fəaliyyətini davam etdirəcəyini bildirib.