Gürcüstanda elektrik kəsintiləri ilə bağlı təxribat maddəsi üzrə istintaq başlanıb

Gürcüstanın Dövlət Təhlükəsizlik Xidməti (DTX) iyulun 24 və 25-də ölkədə baş vermiş genişmiqyaslı elektrik enerjisi kəsintiləri ilə bağlı təxribat maddəsi üzrə cinayət işi açaraq istintaqa başlayıb. 

Yerli KİV-in məlumatına görə, araşdırmanın məqsədi elektrik enerjisinin verilişində yaranmış fasilələrin səbəblərini müəyyənləşdirmək və hadisədə qəsdən müdaxilə əlamətlərinin olub-olmadığını araşdırmaqdır. DTX bildirib ki, istintaqın gedişi barədə ictimaiyyətə mərhələli şəkildə məlumat veriləcək. 

İyulun 24-nə keçən gecə Tbilisi də daxil olmaqla Gürcüstanın bir sıra şəhərlərində kütləvi elektrik kəsintisi qeydə alınıb. Nəticədə işıqforların fəaliyyətində nasazlıqlar yaranıb, mobil rabitə və internet xidmətlərində fasilələr müşahidə olunub. Elektrik enerjisinin verilişi sonradan mərhələli şəkildə bərpa edilib, hadisənin dəqiq səbəbi isə hələ rəsmi açıqlanmayıb.