Azərbaycan tərəfindən axtarışa verilən Rusiya nazirinin müşaviri istefa verib

Azərbaycanın terrorizmə açıq çağırışlar da daxil olmaqla bir sıra ittihamlarla axtarışa verdiyi Rusiya nəqliyyat nazirinin müşaviri Aleksey Çadayev vəzifəsindən istefa verdiyini bildirib.

“Mən Rusiya nəqliyyat nazirinin müşaviri vəzifəsindən istefa vermək qərarına gəldim”, - Çadayev çərşənbə axşamı Telegram kanalında yazıb.

Azərbaycan Baş Prokurorluğu avqustun 17-də Çadayev, “Moskva 24” telekanalının aparıcısı İvan Knyazev və siyasi məsləhətçi və media şərhçisi Semyon Uralov barəsində axtarış elan edildiyini bildirib.

Prokurorluğun məlumatına görə, üç Rusiya vətəndaşı terrorizmə açıq çağırışlar, Azərbaycan dövlətinə qarşı hərəkətlər və etnik nifrətin qızışdırılması da daxil olmaqla bir sıra əməllərdə ittiham olunur.

Azərbaycan Xarici İşlər Nazirliyi çərşənbə axşamı Rusiyanın Bakıdakı səfiri Mixail Yevdokimovu çağıraraq Rusiya mediasında Azərbaycan xalqı və ölkə rəhbərliyinə qarşı səsləndirilən açıqlamalarla bağlı etirazını bildirib.