ABŞ-da II Dünya Müharibəsindən sonra ilk əsgər edam ediləcək

ABŞ Ordusu 2009-cu ildə Texas ştatındakı Fort Hud hərbi bazasında 13 nəfəri öldürən keçmiş hərbçi Nidal Malik Həsənin edam tarixini açıqlayıb. Həsən dekabrın 3-də güllələnmə üsulu ilə edam ediləcək.

ABŞ Ordusunun müvəqqəti katibi Adam Tellin qeydində edamın dekabrın 3-də yerli vaxtla saat 13:00-da Fort Hudda həyata keçiriləcəyi bildirilib.

ABŞ Prezidenti Donald Tramp daha əvvəl Həsənin güllələnmə yolu ilə edamına icazə verib. Həsən 2013-cü ildə hərbi məhkəmə tərəfindən 13 nəfərin qəsdən öldürülməsində və 32 nəfərin öldürülməsinə cəhddə təqsirli bilinərək ölüm cəzasına məhkum edilib.

Hadisə 5 noyabr 2009-cu ildə Fort Hud bazasında baş verib. Hərbi psixiatr Nidal Həsən əsgərlərin yerləşdirilmə mərkəzində atəş açaraq 13 nəfəri öldürüb, 32 nəfəri yaralayıb. O, hadisə zamanı polis tərəfindən yaralanaraq saxlanılıb və nəticədə beldən aşağı iflic olub.

ABŞ ordusunda sonuncu hərbi edam 1961-ci ildə həyata keçirilib. Lakin güllələnmə üsulu ilə sonuncu hərbi edam 1945-ci ildə baş verib. Həsənin edamı həyata keçirilərsə, ABŞ ordusunda 65 ildən çox müddətdən sonra ilk hərbi edam olacaq və 1945-ci ildən bəri güllələnmə üsulu ilə ilk belə edam kimi qeydə alınacaq.

Gülnar Nazimqızı