Saakaşvili: "Əslində prezidentə bu pasport ömürlük verilməlidir"

Gürcüstanın keçmiş prezidenti Mixail Saakaşvili cümə axşamı Strasburqda gürcü jurnalistlərə bildirib ki, Avropa parlamentinin yaxın saatlarda Gürcüstanın Avropa İttifaqı ilə assosiasiya haqqında sazişinin təsdiq olunacağı  iclasına adi vətəndaş kimi gəlib.

O bildirib ki, təəccüb hissi ilə Gürcüstan XİN-nin onun prezident pasportunu ləğv etdiyini öyrənib.

"Mənim Strasburqa uçduğum təyyarənin məxsus olduğu aviaşirkətdən prezident pasportumun ləğv olunduğunu bildirdilər. Lakin əslində prezidentə bu pasport ömürlük verilməlidir. Bu hal mənim uçuşuma heç bir şəkildə təsir göstərməyib”, - deyə, Saakaşvili bildirib.

Gürcüstanın Baş prokurorluğu cari ilin iyulunda bir neçə iş üzrə Saakaşvilinin barəsində cinayət araşdırmasına başlayıb və onu daxili axtarışa verib. İnterpol hələlik gürcü prokurorluğunun keçmiş prezidenti beynəlxalq axtarışa vermək barədə xahişini təsdiq etməyib. //oxu.az