Obama Ukraynaya dəstək üçün 1 milyard dollar istəyir

Obamanın təqdim etdiyi büdcə layihəsində dəniz hərbi əməliyyatları üçün 7, İŞİD və Suriya üçün isə 3,5 milyard dollarlıq pay nəzərdə tutulub.

ABŞ prezidenti Barak Obama 2016-cı il üçün 4 trilyon dollarlıq dövlət büdcəsi layihəsini Konqresə təqdim edib. Lahiyədə ABŞ xarici işlər nazirliyi ilə ABŞ Beynəlxalq İnkişaf Agentliyi (USAİD) üçün ayrılan büdcə toplamda 50.3 milyard dollar təşkil edib. Bu məbləğin 7 milyardı dəniz hərbi əməliyyatları üçün nəzərdə tutulub.

Büdcə layihəsində İŞİD-lə mübarizəyə və Suriyadakı böhranın aradan qaldırılması üçün 3,5 milyard dollar ayrılması qərara alınır.

Digər ölkələrlə birlikdə beynəlxalq ortaq təhlükəsizlik problemlərinin həll yollarının axtarılması və əməkdaşlıq üçün büdcənin 5.4 milyard dollarının xərclənməsi təklif edilir.

Layihədə Ukrayna da yaddan çıxmayıb - Rusiyanın Ukraynadakı "aqressiv hücumları və basqıları" ilə mübarizə aparmaq və Ukraynanı dəstəkləmək üçün, eyni zamanda ayrı-ayrı iqtisadi proqramlara cəlb etmək məqsədilə 275 milyon dollar kredit qarantisi də daxil olmaqla 1 milyard dollara qədər büdcə ortaya qoyulub.

Bundan əlavə layihədə Suriya, cənubi Sudan, Orta Afrika Respublikaları və İraq kimi qeyri-sabit ölkələrdə insan haqlarının qorunması məqsədilə 5,6 milyard dollar ayrılması proqnozlaşdırılıb.

ANN.Az