Xəbərdarlıq edilmədən müəllim işdən çıxarılıb- ŞİKAYƏT

 

"Mənim aylıq əmək haqqımdan pul tutulub. Buna baxmayaraq, heç bir xəbərdarlıq edilmədən işdən azad olunduğumu bildirdilər. Dərs zamanı bütün diqqətimi şagirdlərin biliklərinin möhkəmləndirilməsinə yönəldərək, jurnalda üç mövzunu yazmamışam. Maaşımdan pul tutulub, töhmət verilibsə, nəyə görə işdən çıxarılmalıyam? 16 ildir həmin məktəbin  ingilis dili müəllimiyəm. Dərs saatım 6 saatdır. Jurnalı yazmamağımın səbəbim sinif rəhbərinin jurnalı gec hazır etməsi olub", - müəllim söyləyir.

 

Məsələ ilə bağlı həmin məktəbin direktoru Ziya Şükürov bildirir ki,  Təhsil Nazirliyi tərəfindən müəllimə sinif jurnalını yazmadığına görə əmr gəlib və müəllim işdən çıxarılıb.

 

"Direktor kimi töhmət vermişəm, əmək haqqının müəyyən hissəsi tutulub. İşdən çıxarılması Təhsil Nazirliyi tərəfindən həyata keçirilib", - direktor deyib.

  

Təhsil eksperti Kamran Əsədovun fikrincə, əmək məcəlləsinin 69, 70 və 72- ci madəsinin tələblərinə əsasən müəllim üç mövzunu yazmadığına görə işdən azad edilə bilməz.

 

"Bu məktəb direktorunun səlahiyyətində deyil. İşçi xoşuna gəlmir deyə, işdən çıxarıla bilməz. İşçinin işdən azad edilməsi halları var.  Əgər işçinü üç mövzunu yazmadığına görə işdən çıxarılarsa, bu  ciddi qanun pozuntusudur. Bu zaman müəllim rahatlıqla işinə yenidən  bərpa oluna bilər. Təhsil Nazirliyi buna görə əmr verə bilməz. Əvvəlcə işçiyə xəbərdarlıq edilməli, töhmət,  şiddətli töhmət daha sonra isə işdən çıxarıla bilər.

 

 Təhsil Nazirliyindən isə bildirildi ki, məsələ hazırda araşdırılır. Yaxın zamanda mətbuata məlumat veriləcək.