Nazirlik Emin Əmrullayevlə bağlı iradlara AYDINLIQ GƏTİRDİ

Emin Əmrullayevin yeni təyinat olmadan elm və təhsil naziri kimi təqdim olunması barədə iradlara rəsmi münasibət açıqlanıb.
 
Elm və Təhsil Nazirliyindən Modern.az-ın sorğusuna cavab olaraq bildirilib ki, burada nazir vəzifəsinə yeni təyinatdan söhbət gedə bilməz.
 
"Azərbaycan Respublikasının Prezidenti cənab İlham Əliyevin elm və təhsilin qarşılıqlı əlaqəsinin möhkəmləndirilməsi və bu sahələrdə idarəetmənin təkmilləşdirilməsi məqsədilə imzaladığı Fərmanla Təhsil Nazirliyinin adı Elm və təhsil Nazirliyi olaraq adlandırılıb.
 
Eləcə də, elm sahəsində dövlət siyasəti və tənzimlənməsi, elmi müəssisə və təşkilatların elmi fəaliyyətinin əlaqələndirilməsi və istiqamətləndirilməsi ilə bağlı səlahiyyətlər Nazirliyə həvalə edilib. Buradan da aydın göründüyü kimi, Elm və Təhsil Nazirliyinin yenidən təşkili, elm və təhsil naziri vəzifəsinə yeni təyinatdan söhbət getmir. Emin Əmrullayev elm və təhsil naziri kimi öz vəzifəsini icra edir", - rəsmi açıqlamada vurğulanıb.

www.anews.az