Kənd təsərrüfatı məhsulları daşıyan 3 gəmi Ukraynadan yola salınıb

Sentyabrın 5-i  səhər saatlarında kənd təsərrüfatı məhsulları daşıyan daha üç gəmi Ukrayna limanlarını tərk edib, Türkiyənin Milli Müdafiə Nazirliyi xəbər verir.

İstanbuldakı Birgə Koordinasiya Mərkəzinin nəzarəti altında Ukrayna limanlarından kənd təsərrüfatı məhsullarının tədarükü davam edir.

Avqustun əvvəlindən taxıl dəhlizi ilə bir milyon tondan çox kənd təsərrüfatı məhsulları ixrac edilib.

İyulun 22-də İstanbulda Türkiyə prezidenti Rəcəb Tayyib Ərdoğan və BMT-nin baş katibi Antonio Quterreşin iştirakı ilə Ukrayna limanlarından taxılın təhlükəsiz daşınmasına dair saziş imzalanıb. Sənədi Ukrayna, Rusiya, BMT və Türkiyə nümayəndələri imzalayıblar.

Taxıl müqaviləsi Ukraynanın Odessa, Yujnı və Çernomorsk limanlarını əhatə edir.

Ukrayna limanlarından taxılın təhlükəsiz daşınması üzrə Anlaşma Təşəbbüsünün müddəalarının həyata keçirilməsi çərçivəsində kənd təsərrüfatı məhsulları daşıyan gəmilərin dəniz dəhlizi ilə təhlükəsiz keçməsinə nəzarət etmək, gəmilərin təhvil verilməsinin qarşısını almaq üçün yoxlanılması məqsədilə Birgə Koordinasiya Mərkəzi yaradılmışdır.

www.anews.az