İctimai fəal Bəxtiyar Hacıyev işgəncələrə məruz qalır - Rüfət Səfərov

Hüquq müdafiəçisi Rüfət Səfərov həbsdə olan ictimai fəal Bəxtiyar Hacıyevin işgəncələrə məruz qaldığını bildirib. Bu barədə o öz feysbuk hesabında məlumat verib. 


Dekabrın 19-da Bəxtiyar Hacıyev vəkili Aqil Layıcla görüşüb. O işgəncələrə məruz qalması barədə vəkilə məlumat verib. 


"Şənbə günü səhər 5 radələrində Bəxtiyar Hacıyevi kamerada  qandallayıb təhqir edərək soyuq kameraya aparıblar və onu istilik sistemi olmayan həmin kamerada 8 saat saxlayıblar. Aclıq edən şəxsə həkim nəzarəti olmalı olduğu halda, su belə verilməyib",- Rüfət Səfərov bildirib.

Hüquq müdafiəçisi qeyd edib ki,  daha sonra Bəxtiyar Hacıyev Penitensiar Xidmətin 1 saylı təcridxanasına aparılıb və orada aclığı dayandırması üçün ona hədə-qorxu gəlinib və aclıq aksiyasının tələbi ilə  ərizəsinə düzəlişlər olunması tələb olunub. 

İctimai fəal Bəxtiyar Hacıyev  barəsində Bakı şəhəri Xətai rayon məhkəməsinin hakimi Fuad Axundovun qərarı ilə 1 ay 20 gün həbs qətimkan tədbiri seçilib. 

Hacıyev jurnalist Ülviyyə Alovlunun şikayəti ilə xuliqanlıqda ittiham olunur və bir-birini böhtanda ittiham edirdilər. 

Bəxtiyar Hacıyev dekabrın 15-də apellasiya şikayəti təmin olunmadıqdan sonra aclıq aksiyasına başlayıb. Dekabrın 18-də isə onun aclığı dayandırdığı bildirilib. Vəkili isə onunla görüşdükdən sonra aclığı hələ də davam etdirdiyini bildirib.


www.anews.az