Ötən il erkən nikaha görə, 20 cinayət işi açılıb

2023-cü ildə 50-dən çox erkən nikahın qarşısı alınıb, onların 20-dən çoxuna cinayət işi açılıb. Bunu Daxili İşlər Nazirliyinin Baş İctimai Təhlükəsizlik İdarəsinin Yetkinlik yaşına çatmayanlara profilaktiki işin təşkili şöbəsinin rəis müavini İmran Əliyev deyib. 

"2023-cü ildə 50- dən çox erkən nikah faktı aşkarlanaraq qarşısı alınıb. Onların 20-dən çoxuna cinayət işi açılıb. Daxili İşlər Nazirliyinin bu məsələdə praktiki yoxlama zamanı bəzi çətinlikləri yaranır. Belə ki, praktiki fəaliyyətdə əməkdaşlarımızı aiddiyatı üzrə ünvana göndərəndə ailədən bizə bildirirlər ki, qızım öz istəyilə ailə qurub. Ailə Məcəlləsində buna sanksiya nəzərdə tutulmur. Bu zaman bizim üzərimizdə ancaq proflaktik tədbirlər görmək qalır. Həmçinin qanunda göstərilir ki, 16 yaşında olan şəxslər cinsi münasibət üçün yaşıl işıq var. Əgər 16 yaşında olan biri hamilə qalırsa 2 il nikaha daxil ola bilmir. Bu kimi məsələlərə baxılması da yaxşı olar”, - İmran Əliyev iyunun 11-də  Milli Məclisin Ailə,Qadın və Uşaq komitəsinin iclasında  Ailə Məcəlləsində, Azərbaycan Respublikasının  Cinayət   Məcəlləsində  və Azərbaycan Respublikasının İnzibati Xətalar Məcəlləsində dəyişiklik edilməsi haqqında Azərbaycan Respublikası qanununun layihəsinə münasibət bildirərkən deyib.

 

Gülnar Nazimqızı