Emin İbrahimov 7 il müddətinə azadlıqdan məhrum edilib

Keçmiş diplomat Emin İbrahimov 7 il müddətinə azadlıqdan məhrum edilib. Bu barədə Bakı Ağır Cinayətlər Məhkəməsi hökm oxuyub. 

İbrahimov iyulun 22-də saxlanılıb. İki gün sonra o, Cinayət Məcəlləsinin 126.2.4 (xuliqanlıq məqsədilə sağlamlığa ağır zərər vurma) və 221.1 (xuliqanlıq) maddələri ilə ittiham edilib.

Vəkilin sözlərinə görə, polis İbrahimovun Qaraçuxur kənd sakini Kamal Şükürovu bıçaqladığını iddia edir.

Lakin İbrahimovun sözlərinə görə, "Xalqlar dostluğu” metrostansiyası yaxınlığında ona tanımadığı şəxs hücum edərək paltarını cırmağa başlayıb. Bir neçə saniyə sonra mülki geyimli polislər peyda olub və İbrahimovu saxlayıblar.

O, vəkilə bildirib ki, həmin şəxs hadisə yerinə təcili yardım maşını ilə gətirilib.

İyulun 24-də Nizami məhkəməsi İbrahimovu 4 ay müddətinə həbs edib.

*İbrahimov 2005-ci ildə Ankara Universitetinin beynəlxalq əlaqələr üzrə magistratura pilləsini bitirib. 2009-cu ildə NATO Müdafiə Kollecinin İxtisasartırma Kurslarında təhsil alıb.

2007-2020-ci illərdə İbrahimov diplomatik xidmətdə olub. 2016-2020-ci illərdə Azərbaycanın ABŞ-dakı səfirliyinin ikinci katibi və Azərbaycanın Uruqvaydakı müvəqqəti işlər vəkili olub.

2020-ci il parlament seçkilərinin saxtalaşdırılmasına etiraz olaraq, İbrahimov diplomatik xidmətdən istefa verib. Bundan sonra o, analitik işlərlə məşğul olub, mediada və sosial şəbəkələrdə şərhlər verib.

N.Təbrizli