Həcc ziyarəti zamanı viza qaydalarını pozanlar 26 min dollar cərimələnəcək

Səudiyyə Ərəbistanının Həcc və Ümrə Nazirliyi Həcc ziyarətində viza qaydalarını pozanlar üçün 26 min dollara qədər böyük məbləğdə cərimələr və Krallığa mümkün giriş qadağası tətbiq olunacağını elan edib.Bu barədə  xarici KİV xəbər verir.

Nazirlik cəzadan yayınmaq üçün qarşıdan gələn mövsümdə Həcc ziyarətinə rəsmi icazənin alınmasının vacibliyini vurğulayıb.

Bildirilib ki, rəsmi icazəsiz və ya turist vizası ilə Həcc ziyarətinə gedən şəxslər 5332 dollar cərimələnəcək.

İcazəsiz Həcc ziyarətinə gedən və ya bunu etməyə cəhd edən şəxs üçün turist vizası üzrə müraciət edən hər kəs 26 min dollara qədər cərimələnəcək. Bu, Həcc dövründə səyahət vizası olanları Məkkəyə və ya müqəddəs yerlərə daşıyan hüquqi və fiziki şəxslərə də aiddir.Bu kateqoriyaya turist vizası sahiblərini otellərdə, mənzillərdə, şəxsi yaşayış yerlərində, sığınacaqlarda və ya zəvvarların məskunlaşdığı digər yerlərdə gizlədənlər, habelə onların Məkkədə və ya müqəddəs yerlərdə qalmalarına hər hansı formada yardım təklif edənlər də daxildir.

Nazirlikdən bildirilib ki,qanunu pozanlara və qeyri-qanuni olaraq Həcc ziyarətinə cəhd edərkən yaxalanan xarici vətəndaşlara 10 il müddətinə Səudiyyə Ərəbistanına giriş qadağan ediləcək.