Əkin sahələrinə 90% çox sığorta ödənişi – Aqrar Fondun yarımillik rekordu

2025-ci ilin altı ayında müxtəlif təbii hadisələrdən zərər çəkmiş fermer və təsərrüfatlara ümumilikdə 4 milyon 435 min manat məbləğində sığorta ödənişi verilib ki, bu da ötən ilin eyni dövrü ilə müqayisədə 55% çoxdur. Bu barədə Aqrar sığorta Fondundan bildirilib. 

 2024-cü ilin ilk yarısında bu rəqəm 2 milyon 864 min manat təşkil etmişdi.

Əkin sahələri üzrə ödənişlər isə 2 dəfəyə yaxın artaraq 4 milyon 246 min manat olub. Heyvandarlıq sahəsi üzrə isə 189 min manat sığorta ödənişi gerçəkləşib.

Fond bildirir ki, təqribən 17 min hektar ərazidə baş vermiş sığorta hadisələrinə görə ödənişlər 90% artaraq bu günə qədər qeydə alınmış ən yüksək həddə çatıb. Ən çox ödəniş edilən kənd təsərrüfatı məhsulları aşağıdakılardır:

Buğda və arpa – 2,5 milyon manat

Pambıq – 577 min manat

Qarğıdalı – 447 min manat

Günəbaxan – 196 min manat

Tütün – 174 min manat

Meyvə bağları – 170 min manat

Ən çox sığorta ödənişi alan rayonlar arasında Füzuli (645,5 min manat), Ağcabədi (607,4 min manat), Tovuz (322 min manat), Tərtər (301 min manat) və Ağsu (273 min manat) rayonları yer alır.

Aqrar Sığorta Fondu bildirir ki, məhsulların sığorta şərtləri və tarifləri barədə ətraflı məlumatı qurumun rəsmi veb saytından və 1651 nömrəli çağrı mərkəzindən əldə etmək mümkündür.

Gülnar Nazimqızı