Azərbaycanda 300 min manatlıq kütləvi maliyyə dələduzluğunda şübhəli şəxs saxlanılıb

Azərbaycanda vətəndaşların şəxsi məlumatları və bank hesabları üzərindən kütləvi maliyyə dələduzluğu törətməkdə şübhəli bilinən şəxs əməliyyat-texniki tədbirlərlə saxlanılıb. Bu barədə Daxili İşlər Nazirliyi məlumat yayıb.

34 yaşlı Qulamov Eldəniz Şayiq oğlu qabaqcadan əlbir olan bir qrup şəxslə birlikdə informasiya texnologiyalarından istifadə edərək bank hesablarına qanunsuz müdaxilə və oğurluq əməlləri törətməkdə şübhəli bilinir.

Araşdırmalar nəticəsində müəyyən olunub ki, şübhəli şəxslər müxtəlif sosial şəbəkələr və messencerlər (Facebook, Instagram, WhatsApp) üzərindən vətəndaşların şəxsiyyət vəsiqələrini, pasport və bank kartı məlumatlarını əldə edərək saxta profillərlə fəaliyyət göstəriblər. Özlərini bank və dövlət qurumlarının nümayəndəsi kimi təqdim edərək vətəndaşların üz görüntülərini də videoqeydiyyata alıblar.

Cinayətkar qrup əldə etdikləri məlumatları kiber mühitdə emal və istifadə edərək 300 min manatdan artıq maddi zərər vurub.