Azərbaycan Ukraynaya əlavə humanitar yardım ayırıb

Azərbaycan Prezidenti İlham Əliyev Ukraynaya növbəti humanitar yardımın göstərilməsi ilə bağlı sərəncam imzalayıb. 

Sərəncama əsasən, Ukraynaya humanitar yardım məqsədilə Azərbaycanda istehsal olunan elektrik avadanlığının alınması və göndərilməsi üçün Prezidentin 2025-ci il dövlət büdcəsindəki ehtiyat fondundan Energetika Nazirliyinə iki milyon ABŞ dolları məbləğində vəsaitin manat ekvivalentində ayrılması nəzərdə tutulur.

Sənəddə qeyd edilir ki, Azərbaycan humanizm prinsiplərinə əsaslanaraq, ikitərəfli və çoxtərəfli formatda müxtəlif ölkələrə humanitar yardım göstərir. Son illərdə Ukraynada yaranmış vəziyyətlə əlaqədar Azərbaycan dövləti tərəfindən bu ölkəyə bir neçə dəfə yardım göndərilib.

Sərəncamda, həmçinin, Azərbaycan ilə Ukrayna arasında dostluq və tərəfdaşlıq münasibətlərinin mövcud ikitərəfli sənədlər – 2000-ci il tarixli dostluq və əməkdaşlıq müqaviləsi, 2008-ci il strateji tərəfdaşlıq haqqında bəyannamə və 2022-ci il prezidentlərin birgə bəyannaməsi – əsasında inkişaf etdiyi vurğulanıb.

Rəsmi məlumatlara görə, bu yardım paketi Ukraynaya Azərbaycanın göndərdiyi növbəti dəstək aktı kimi qiymətləndirilir.