Sanremo İnstitutu 50 ildə 30 min mütəxəssisi beynəlxalq humanitar hüquq üzrə hazırlayıb — Giorgio Battisti

1970-ci ildə İtaliyanın Sanremo şəhərində yaradılan institut 50 ildən çox fəaliyyət dövründə 170-dən çox ölkədən 30 mindən artıq iştirakçıya beynəlxalq humanitar hüquq (BHH) və insan hüquqları sahəsində təlim keçib. Bunu Beynəlxalq Humanitar Hüquq İnstitutunun prezidenti Giorgio Battisti bildirib.

Onun sözlərinə görə, institutun əsas məqsədi BHH prinsiplərinin yayılması və müharibə zamanı hüquq pozuntularının qarşısının alınması üçün hərbi və mülki personalın hazırlanmasıdır. 

“Təlimlər və maarifləndirmə yalnız nəzəri deyil, münaqişə zamanı qanunların pozulmasının qarşısını almaq üçün zəruri vasitədir,” — Battisti deyib.

O vurğulayıb ki, Sanremo İnstitutu bu illər ərzində BMT, UNESCO, NATO və Qırmızı Xaç Komitəsi kimi təşkilatlarla əməkdaşlıq edib və “Sanremo ruhunda humanitar dialoq” modelini formalaşdırıb. Battisti qeyd edib ki, institutun fəaliyyətində itkin düşmüş şəxslərin taleyinin müəyyənləşdirilməsi və ailələrin bu barədə məlumat alma hüququ humanitar və hüquqi prioritet kimi qalır.

N.Təbrizli