Həkim Sənan Mehdiyev 2 il azadlıqdan məhrum edilib

Azərbaycanda burun (septoplastika) əməliyyatından sonra komaya düşərək həyatını itirən 28 yaşlı Nəzrin Mənsurlunun ölümündə təqsirləndirilən həkim Sənan Mehdiyev 2 il müddətinə azadlıqdan məhrum edilib. Bununla bağlı Bakı şəhəri Nəsimi Rayon Məhkəməsi qərar çıxarıb. 

Mehdiyev cəzasını məntəqə tipli cəzaçəkmə müəssisəsində çəkəcək. O, Azərbaycan Cinayət Məcəlləsinin 314.2-ci maddəsi (səhlənkarlıq, ehtiyatsızlıqdan ölümə səbəb olduqda) ilə təqsirli bilinib.

İstintaq materiallarına görə, 1995-ci il təvəllüdlü Nəzrin Aydın qızı Mənsurlu 2024-cü il yanvarın 3-də paytaxtın Nəsimi rayonu ərazisində yerləşən özəl klinikalardan birində septoplastika əməliyyatı (burun çəpərinin düzəldilməsi) keçirib.

Əməliyyatdan dərhal sonra onun səhhətində kəskin pisləşmə müşahidə olunub və o, başqa bir xəstəxanaya yerləşdirilib. Yanvarın 12-də, 9 gün sonra o, xəstəxanada dünyasını dəyişib.

Bununla bağlı Nəsimi rayon prokurorluğu tərəfindən cinayət işi başlanılıb və araşdırma nəticəsində əməliyyatı icra edən Sənan Mehdiyev barəsində səhlənkarlıq nəticəsində ölümə səbəb olma ittihamı irəli sürülüb.

Aytac