Hikmət Hacıyev NATO-nun Baş Qərargahında olub

Azərbaycan Prezidentinin köməkçisi, Prezident Administrasiyasının Xarici siyasət məsələləri şöbəsinin müdiri Hikmət Hacıyev Brüsseldə NATO Baş Qərargahını ziyarət edib. Bu barədə Azərbaycanın NATO-dakı nümayəndəliyi “X” sosial şəbəkəsində məlumat yayıb.

Hacıyev səfər zamanı NATO-nun Şimal Atlantik Şurasının səfirləri və Baş katibin siyasi məsələlər və təhlükəsizlik siyasəti üzrə köməkçisi Ruqe Boris ilə görüşüb.

Görüşlərdə NATO Şurası səfirlərinin Azərbaycana səfəri və Prezident İlham Əliyevlə keçirdikləri görüş xatırladılıb. Tərəflər Azərbaycan-NATO əməkdaşlığının hazırkı vəziyyəti və gələcək perspektivlərini, Azərbaycanın Alyansa və Avropanın enerji təhlükəsizliyinə verdiyi töhfələri, həmçinin regional təhlükəsizlik və Azərbaycan-Ermənistan sülh gündəliyi ilə bağlı məsələləri müzakirə ediblər.