Bakıda çoxmərtəbəli binada yanğın - Ölənlər var

Bakının Qaradağ rayonu, Lökbatan qəsəbəsində yerləşən “Qobu Park-1” yaşayış kompleksində çoxmərtəbəli binada yanğın baş verib, azı dörd nəfər həyatını itirib. Bu barədə Fövqəladə Hallar Nazirliyi (FHN) məlumat yayıb.

Nazirliyin məlumatına görə, yanğın doqquzmərtəbəli binanın yeddinci mərtəbəsindəki ikiotaqlı mənzildə baş verib və yanğının digər mənzillərə keçməsinin qarşısı qısa müddətdə alınıb. Hadisə zamanı mənzilin mətbəx və dəhliz hissələri ümumilikdə 13 kvadratmetr sahədə yanıb.

Hadisə yerinə FHN-in Dövlət Yanğından Mühafizə və Xüsusi Riskli Xilasetmə xidmətləri ilə yanaşı, təcili yardım briqadaları və polis əməkdaşları cəlb olunub. Təhlükəsizlik tədbirləri çərçivəsində bina sakinləri təxliyə edilib.

Əvvəlki məlumatlarda hadisə şahidlərinin ehtimallarına əsasən beş nəfərin — o cümlədən iki uşağın — öldüyü bildirilirdi. Rəsmi məlumat ölənlərin sayını dörd nəfər kimi təsdiqləyib. Yaralılarla bağlı məlumat açıqlanmayıb.

Yanğının səbəbi araşdırılır.