"Meydan TV" işi üzrə növbəti məhkəmə prosesi keçirilib

Bakı Ağır Cinayətlər Məhkəməsndə Meydan TV-nin baş redaktoru Aynur Qəmbərova, jurnalistlər Natiq Cavadlı, Aytac Tapdıq, Aysel Umudova, Ülviyyə Quliyeva, Xəyalə Ağayeva, Ramin Cəbrayılzadə, həmçinin müstəqil jurnalist Nurlan Qəhrəman, “Arqument.az” saytının rəhbəri Şəmşad Ağayev, foto-müxbir Əhməd Muxtarın cinayət işi üzrə məhkəmə prosesi keçirilib.

Məhkəmə hakim Aytən Əliyevanın sədrliyi ilə keçirilib.

Ülviyyə  Quliyeva və Aysel Umudova vəkili Rövşanə Rəhimli vəsatət qaldıraraq, bildirib ki, əgər azad mətbuatdan danışırıqsa, jurnalistlərin məhkəmə zalına girişinə icazə verilməlidir. Videomateriallar hazırlanmalıdır. Vəkil həmçinin sübutların qiymətləndirilməsi sənədləri təqdim olunmasını tələb edib. Hakim Aytən Əliyeva isə sənədlərin elektron fomada olmadığını, ancaq PDF formasına çevirib götürə biləcklərini vurğulayıb.

Ülviyyə Quliyeva əməliyyatına aid olan diskin verilməsini, telefonlarının yaddaşında olan materialların verilməsi üçün vəsatət qalırıb. Vəsatətə baxılacağı vurğulanıb.

Aynur Qənbərova pensiya kartının verilməsini istəyib.

"Bununla bağlı ərizə də yazmışam. Yaxın günlərdə veriləcəyi deyilsə də, verilmir. 13 aydır ki, pensiya kartımdakı pulu əldə edə bilmirəm. Kartlar istintaq altındadır. Həmçinin itimin görüşə gətirilməsini istəyirəm",- Qənbərova bildirib.

Hakim Aytən Əliyeva isə bununla bağlı sorğu göndərəcəyini bildirdi. Ev heyvanı ilə bağlı məsələyə isə icazənin olmadığını bildirdi.

Növbəti məhkəmə prosesi yanvarın 16-na təyin edilib.

2024-cü ilin dekabrında "Meydan TV" əməkdaşları – Ramin Cəbrayılzadə (Ramin Deko), Aynur Qəmbərova (Elgünəş), Aytac Əhmədova (Tapdıq), Aysel Umudova, Xəyalə Ağayeva, Natiq Cavadlı və Ülvi Tahirov saxlanılıblar.

Daha sonra isə 2025-ci ilin fevralın fevralın 5-də “Arqument.az” saytının rəhbəri Şəmşad Ağayev (Şəmşad Ağa) “Meydan TV işi” üzrə şübhəli şəxs qismində saxlanılıb.

Fevralın 20-də Nurlan Qəhrəmanlı (Libre), fevralın 28-də Fatimə Mövlamlı, mayın 7-də isə Ülviyyə Əli saxlanılıblar.

Daxili İşlər Nazirliyinin yaydığı məlumatda adıçəkilən şəxslərin ölkəyə qanunsuz xarici valyuta gətirməklə bağlı daxil olan məlumat əsasında saxlanıldıqları bildirilib.

Onlara Cinayət Məcəlləsinin 206.3.2-ci (qaçaqmalçılıq, əvvəlcədən əlbir olan bir qrup şəxs tərəfindən törədildikdə) maddəsi ilə ittiham verilib.

Mühakimə olunan şəxslərin hər biri ittihamları qəbul etmir, onlar özlərini təqsirli bilməyiblər.

Aytac Zeynalova