Baş Prokurorluq: Azərbaycan vətəndaşlarının Rusiya-Ukrayna müharibəsində iştirakı cinayət hesab olunur

Baş Prokurorluq xəbərdarlıq edib ki, Rusiya-Ukrayna müharibəsində və digər silahlı münaqişələrdə iştirak edən Azərbaycan vətəndaşlarının fəaliyyəti milli qanunvericiliyə görə cinayət sayılır.

Prokurorluq bildirib ki, döyüşlərdə həlak olan, yaralanan və ya əsir düşən vətəndaşlarımız var və dövlət hüquqi məsuliyyət prinsipinə əsasən bu cür fəaliyyətlə məşğul olan şəxslərə qarşı barışmaz mövqe nümayiş etdirir.

Azərbaycan Respublikasının Cinayət Məcəlləsinə görə, muzdluluq – yəni maddi mükafat qarşılığında xarici silahlı münaqişələrdə iştirak – 8 ildən 20 ilədək və ya ömürlük azadlıqdan məhrumetmə cəzası ilə nəticələnə bilər. Qanunsuz silahlı birləşmələrdə iştirak da cinayət hesab olunur.

Baş Prokurorluq qeyd edib ki, artıq bir neçə vətəndaş barəsində cinayət işləri başlanılıb, bəzi işlər üzrə məhkəmələr uzunmüddətli azadlıqdan məhrum etmə cəzaları tətbiq edib, digərləri üzrə isə ibtidai istintaq davam edir.

Vətəndaşlara çağırış edilib ki, qanunsuz çağırışlara uymamaq, milli maraqları uca tutmaq və Azərbaycan qanunlarına hörmətlə yanaşmaq lazımdır.