Distant təhsil pilot olaraq Lənkəran və Astarada sınaqdan keçirilir

Ölkədə şagird sayı az olan 100-dən çox məktəbdə distant təhsilin mərhələli şəkildə tətbiqinə başlanılıb. Bunu Məktəbəqədər və Ümumi Təhsil üzrə Dövlət Agentliyinin (MÜTƏDA) direktor müavini Vəfa Yaqublu bildirib.

Yaqublu İTV-nin “Sabaha saxlamayaq” verilişində qeyd edib ki, pilot layihə Lənkəran-Astara bölgəsində bir neçə məktəbdə sınaqdan keçirilib və qənaətbəxş nəticələr əldə olunub. 

Onun sözlərinə görə, yuxarı siniflərdə biologiya, kimya, tarix və digər müəllim çatışmayan fənlər üzrə dərslər bölgənin mərkəzi məktəblərinin müəllimləri tərəfindən distant formada həyata keçirilir. Hər kənddən bir neçə uşaq həmin siniflərdə tədris alır.

Direktor müavini əlavə edib ki, şagird sayı az olan məktəblərin sayı daxili miqrasiyadan asılı olaraq dəyişir.

MÜTƏDA-nın məlumatına görə, Azərbaycanda 2025-ci il üzrə orta məktəblərin şagird sayı bəzi regionlarda demoqrafik dəyişikliklər və miqrasiya səbəbindən azalmaqdadır. Bu tendensiya distant təhsilin tətbiqini aktuallaşdırır.

Aytac