Sosial şəbəkələrdə onlayn dələduzluq: 23 yaşlı şəxs saxlanılıb

Daxili İşlər Nazirliyi (DİN) Kibercinayətkarlıqla Mübarizə Baş İdarəsi sosial şəbəkələrdə istifadəçilərin adlarından saxta profillər yaradaraq onlayn dələduzluq edən şəxsi saxlayıb.

Əməliyyat zamanı əvvəllər dəfələrlə məhkum olunmuş 23 yaşlı Zaur Teymurxanov müəyyən edilib. Araşdırmalar göstərir ki, o, istifadəçilərin profil şəkillərini götürərək saxta hesablar yaradıb və həmin şəxslərin dost siyahısında olan insanlara guya bank kampaniyaları ilə bağlı mesajlar göndərərək kart məlumatları və “OTP” kodlarını əldə edib.

DİN-in məlumatına görə, Teymurxanovun əməli nəticəsində təxminən 150 vətəndaşa maddi ziyan dəyib. O, ələ keçirdiyi vəsaiti xarici onlayn alış-veriş platformalarına yönləndirərək şəxsiyyətini gizlətməyə çalışıb.

Faktla bağlı cinayət işi açılıb və Teymurxanov barəsində məhkəmə tərəfindən həbs qətimkan tədbiri seçilib.

Polis vətəndaşlara xəbərdarlıq edib ki, bank əməkdaşları heç bir halda kart məlumatları, PIN və OTP kodları tələb etmir. Belə müraciətlərlə qarşılaşan şəxslərə əlaqəni dərhal dayandırmaq və polisə məlumat vermək tövsiyə olunur.

Aytac