Trampın yeni tarif hədələri Böyük Britaniyanı resessiya riski ilə üz-üzə qoya bilər

ABŞ Prezidenti Donald Trampın Böyük Britaniya və bir sıra Avropa ölkələrinə qarşı əlavə tarif hədələrinin sürətlə reallaşması halında Britaniya iqtisadiyyatı resessiya ilə qarşılaşa bilər. Bu barədə “Capital Economics”in açıqladığı hesablamalarda bildirilir.

Analitiklərin qiymətləndirməsinə görə, ABŞ-ın hazırda tətbiq etdiyi 10 faizlik idxal rüsumlarına əlavə artımlar olarsa, Böyük Britaniyanın ÜDM-i 0,3–0,75 faiz azalacaq. Dünya Bankının proqnozlarına istinadən qeyd olunur ki, tariflərin iyun ayından etibarən 25 faizə qaldırılması ölkə iqtisadiyyatına təxminən 21,6 milyard funt sterlinq həcmində zərər vura bilər.

“Capital Economics”in baş iqtisadçısı Pol Deyls bildirib ki, hazırda Böyük Britaniya iqtisadiyyatı rüblük 0,2–0,3 faiz artım tempindədir və tarif şoku qısa müddətdə baş verərsə, bu, resessiyanı tətikləyə bilər.

Məlumat Britaniyanın Baş naziri Kir Starmerin ABŞ Nümayəndələr Palatasının spikeri Mayk Consonu Dauninq Stritdə qəbul etməsindən sonra yayılıb. Eyni zamanda, Prezident Trampın Böyük Britaniya və daha yeddi Avropa ölkəsinə əlavə tariflər tətbiq edəcəyi ilə bağlı açıqlamasından sonra qlobal fond bazarlarında eniş müşahidə olunub. Xüsusilə avtomobil istehsalçıları zərər çəkib, Avropa birjalarında isə kəskin ucuzlaşma qeydə alınıb.

ABŞ-ın Danimarkaya məxsus Qrenlandiya ilə bağlı mövqeyini sərtləşdirməsi Avropada narahatlığı daha da artırıb. Baş nazir Kir Starmer isə bildirib ki, Böyük Britaniya ABŞ-a qarşı cavab tarifləri tətbiq etməyi planlaşdırmır və Vaşinqton gərginliyə baxmayaraq, London üçün əsas müttəfiq olaraq qalır.