Milli Məclisdə 2026-cı il üzrə gənclərlə bağlı tədbirlər planı hazırlanıb

 Milli Məclisin müvafiq komitəsi 2026-cı ildə həyata keçiriləcək tədbirləri əhatə edən fəaliyyət planını təsdiqləyib. Sənədə əsasən, tədbirlər əsasən sessiya müddətində və fevralda icra olunacaq.

Plana görə, Azərbaycan Respublikası Prezidentinin 22 dekabr 2025-ci il tarixli Sərəncamına uyğun olaraq 2026-cı ilin “Şəhərsalma və Memarlıq ili” elan edilməsi ilə bağlı gənclərin maarifləndirilməsi tədbirləri təşkil ediləcək.

Həmçinin gənclər və idman sahəsində beynəlxalq təşkilatlar, eləcə də xarici dövlət qurumları ilə əməkdaşlığın gücləndirilməsi nəzərdə tutulur.

Tədbirlər planına “Yaşatmaq yaşamaq kimi gözəldir” şüarı altında qanvermə aksiyasının keçirilməsi, 2 Fevral – Gənclər Gününə həsr olunmuş “Azərbaycan gəncliyi: Ulu Öndər ideyalarından müasir inkişaf mərhələsinədək” mövzusunda konfransın Naxçıvanda təşkili daxildir.

Bundan əlavə, Gənclər Günü münasibətilə şəhid övladı olan tələbələrlə Milli Məclisdə görüşün keçirilməsi və Xocalı soyqırımına həsr olunmuş anım tədbirlərinin təşkili planlaşdırılır.
Sənədə görə, tədbirlərin icrasına komitə sədri və üzvləri cavabdehdir, təşkilati məsələlər isə Milli Məclisin aidiyyəti şöbələri tərəfindən həyata keçiriləcək.

Gülnar Nazimqızı