Vətəndaşlar ötən il ən çox kommunal xidmətlərlə bağlı şikayət edib - Statistika

2025-ci ildə Azərbaycan Respublikasının İnsan Hüquqları üzrə Müvəkkili (Ombudsman) yanında fəaliyyət göstərən 916 Çağrı Mərkəzinə daxil olan müraciətlərin statistik təhlili göstərir ki, vətəndaşlar ən çox kommunal xidmətlər və sosial təminatla bağlı problemlər üzrə müraciət ediblər.

Ombudsmanın yaydığı məlumata görə, ötən il çağrı mərkəzinə kommunal problemlər üzrə 1 172, ünvanlı dövlət sosial yardımı ilə bağlı isə 1 171 müraciət daxil olub.

Qeyd olunan sahələr hüquq pozuntusu ehtimalı olan müraciətlər arasında ilk yerləri tutub.

Müraciətlərin əhəmiyyətli hissəsi həmçinin müayinə və müalicə (755), Dövlət Yol Polisi ilə bağlı məsələlər (712), qeyri-obyektiv təhqiqat və istintaq (702), eləcə də məhkəmə qərarlarının icra olunmaması (627) ilə bağlı olub.

Bundan başqa, əlilliyin müəyyən edilməsi (616), müraciətlərin qeydə alınmaması (602), aliment məsələləri (602), məşğulluq (599), təhsil məsələləri (563) və əmək mübahisələri (540) üzrə də çoxsaylı müraciətlər qeydə alınıb.

Statistikada qanunsuz saxlanma ehtimalı (476), baş çəkmə hüququnun pozulması (406), məhkəmə araşdırmaları (343), qəbulla bağlı məlumatın verilməməsi (340) və pis rəftar ehtimalı (326) kimi insan hüquqlarına dair risklər əksini tapıb.

Eyni zamanda, cinsi zorakılıq (13), məhkəmə qərarının verilməməsi (22), gömrük məsələləri (31) və uşaq zorakılığı (37) üzrə müraciətlərin sayının nisbətən az olduğu bildirilib.

Gülnar Nazimqızı