Ötən il bələdiyyə aktları üzrə ləğv edilən torpaq sahələrinin həcmi üç dəfədən çox azalıb

Ədliyyə Nazirliyinin bələdiyyələrin fəaliyyətinə dair 2025-ci il üzrə illik məruzəsinə əsasən, inzibati nəzarət tədbirləri nəticəsində qanunsuz bələdiyyə aktları üzrə ləğv edilən torpaq sahələrinin həcmi kəskin azalıb.

Hesabatda bildirilir ki, 2024-cü ildə 9 720 hektar, 2025-ci ildə isə 3 142 hektar torpaq sahəsi üzrə bələdiyyə aktları ləğv edilib. Bu, bir il ərzində ləğv edilən torpaq sahələrinin üç dəfədən çox azalması deməkdir.

2025-ci il ərzində aparılan inzibati nəzarət çərçivəsində 3 142 hektar torpaq sahəsinin qanunsuz ayrılması ilə bağlı aktların ləğvi məqsədilə bələdiyyələrə təkliflər verilib və məhkəmələrə iddialar qaldırılıb.

Nəticədə 3 121 hektar torpaq sahəsinin icarəyə, 21 hektar torpaq sahəsinin isə mülkiyyətə verilməsi barədə qəbul edilmiş qanunsuz qərarlar ləğv olunub.

Məruzədə qeyd edilir ki, eyni dövrdə örüş sahələrinin qanunsuz ayrılması və digər pozuntularla bağlı tədbirlər davam etdirilib, bu istiqamətdə 2 057 hektar torpaq sahəsi üzrə qanunsuz aktlar inzibati nəzarət orqanının təklifləri və məhkəmə qərarları əsasında ləğv edilib və ya dəyişdirilib.

Ədliyyə Nazirliyi bildirir ki, görülən tədbirlər bələdiyyə torpaqlarının idarə olunmasında qanunçuluğun və nəzarətin gücləndirilməsinə, habelə qanunsuz torpaq ayrılmalarının qarşısının alınmasına xidmət edir.

Gülnar Nazimqızı