Ötən il yeniyetmələrə siqaret satanların sayı açıqlanıb

2025-ci il ərzində yetkinlik yaşına çatmayanlara tütün məmulatlarının satılması ilə bağlı 1633 fakt aşkarlanıb və obyekt sahibləri barəsində inzibati tədbirlər görülüb. Bu barədə Daxili İşlər Nazirliyindən anews.az-ın sorğusuna cavab olaraq bildirilib. 

Aşkar edilmiş hallar üzrə inzibati protokollar İnzibati Xətalar Məcəlləsinin müvafiq maddəsi ilə tərtib edilib.

"Obyekt sahibləri və satıcılar qanunvericiliyin tələblərinə ciddi əməl etməlidirlər.  “Tanıyıram”, “məhəllə uşağıdır” kimi yanaşmalar hüquqi məsuliyyəti aradan qaldırmır, qanun pozuntusu aşkar edilərsə, cərimə və digər inzibati tədbirlər qaçılmazdır. Xüsusilə valideynlər övladlarının davranışlarına nəzarət etməli, onun hərəkətlərinə diqqətlə yanaşmalı, zərərli vərdişlərin fəsadları barədə onlarla maarifləndirici söhbətlər aparılmalıdır", - sorğuya cavabda qeyd olunub. 

DİN bildirir ki, yetkinlik yaşına çatmayanların sağlamlığının qorunması istiqamətində nəzarət və profilaktik tədbirlər davam etdirilir.

Gülnar Nazimqızı