“Yerin təki haqqında” qanuna dəyişikliklər hazırlanır – xammalın uçotu və şəffaflıq gücləndiriləcək

“Yerin təki haqqında” qanunun 7-ci və 13-cü maddələrində dəyişikliklərin edilməsi nəzərdə tutulur. Bunu deputat Sadiq Qurbanov təbii ehtiyatlar, energetika və ekologiya komitəsinin iclasında bildirib.

Onun sözlərinə görə, Azərbaycanda genişmiqyaslı tikinti və bərpa işləri aparılır və bu prosesdə xammal materiallarına böyük ehtiyac yaranır. Xüsusilə tunellərin qazılması zamanı əldə olunan materiallar sonradan yol tikintisində istifadə olunur.

Deputat qeyd edib ki, dəyişikliklərin əsas məqsədi məhz bu materialların uçotunun aparılması və şəffaflığın artırılmasıdır. Bildirilib ki, əvvəllər yol tikintisində istifadə olunan xammal əlavə maliyyə vəsaiti tələb edirdisə, hazırda mövcud resurslardan səmərəli istifadə və onların qeydiyyatının dəqiq aparılması üçün qanunvericiliyin təkmilləşdirilməsi planlaşdırılır.

Gülnar Nazimqızı