Nəqliyyat vasitələrinin hərəkətinin növbəti monitorinqi həyata keçiriləcək

Bakıda keçiriləcək Ümumdünya Şəhərsalma Forumunun 13-cü sessiyasına (WUF13) hazırlıq çərçivəsində mayın 13-də nəqliyyat vasitələrinin hərəkətinin növbəti monitorinqi keçiriləcək.

WUF13 Azərbaycan Əməliyyat Şirkətinin məlumatına görə, monitorinq çərçivəsində saat 10:00-dan 14:00-dək paytaxtın bir sıra küçə və prospektlərində nəqliyyatın hərəkətinə müvəqqəti tənzimləmələr tətbiq olunacaq.

Məlumata əsasən, monitorinq Neftçilər prospekti, Yusif Səfərov küçəsi, qismən Heydər Əliyev prospekti (Sabunçu körpüsünə qədər), Mehdi Hüseyn küçəsi, Xocalı prospekti, Rixard Zorge küçəsi, Zərifə Əliyeva və Lermontov küçələrini, həmçinin tədbirin keçiriləcəyi Bakı Olimpiya Stadionu istiqamətlərini əhatə edəcək.