WUF13 çərçivəsində 400-dən çox tədbir keçirilib

WUF13 çərçivəsində 400-dən çox tədbir təşkil edilib, əsas sessiyalarda 125 ölkədən 400-dən çox məruzəçi çıxış edib.
Bunu WUF13-ün Milli Koordinatoru Anar Quliyev Ümumdünya Şəhərsalma Forumunun bağlanış mərasimində bildirib.

Onun sözlərinə görə, forumun proqramı qlobal şəhər problemlərinin müzakirəsinə həsr olunub və dialoqlar, xüsusi sessiyalar, dəyirmi masalar, qiymətləndirmələr və paralel tədbirləri əhatə edib.

Quliyev bildirib ki, WUF13-ün əsas xüsusiyyətlərindən biri onun inklüziv xarakteri olub. Forum müxtəlif qrupları və maraqlı tərəfləri bir araya gətirərək şəhərlərin və icmaların gələcəyi ilə bağlı müzakirələr üçün platforma yaradıb.

Onun sözlərinə görə, forum tarixində ilk dəfə QHT Forumu keçirilib. Tədbirdə 100-dən çox ölkədən təxminən 800 iştirakçı qatılıb. QHT Forumu çərçivəsində dayanıqlılıq və qlobal əməkdaşlığa dair Bakı Bəyannaməsi qəbul edilib.

Quliyev qeyd edib ki, WUF13-də təqdim olunan yeniliklərdən biri Biznes İnnovasiya Mərkəzinin yaradılması olub. Platforma startaplar, özəl sektor, investorlar, innovatorlar, dövlət qurumları və inkişaf tərəfdaşları arasında əməkdaşlıq üçün imkan yaradıb.
Forum ümumilikdə 34 min kvadratmetrdən çox ərazini əhatə edib, sərgi sahəsi isə 10 min kvadratmetrdən artıq olub. Sərgidə 81 ölkədən 50-dən çox təşkilat 122 stendlə təmsil olunub.

Azərbaycan pavilyonunda COP29, Bakı 2040 Baş Planı, Böyük Qayıdış Proqramı, ağıllı şəhər və kəndlər, dayanıqlı şəhərsalma və digər istiqamətlər təqdim edilib. Pavilyonda 70-ə yaxın tədbir keçirilib və bu tədbirlərdə 6 minə yaxın yerli və xarici iştirakçı iştirak edib.

Quliyev xatırladıb ki, 2026-cı il Azərbaycanda “Şəhərsalma və Memarlıq İli” elan edilib. O bildirib ki, Qarabağ və Şərqi Zəngəzurda aparılan yenidənqurma işləri forum iştirakçılarının diqqət mərkəzində olub.
WUF13 çərçivəsində 70-dən çox tərəfdaş tədbiri təşkil olunub, müxtəlif formatlarda 150 mindən çox insan proseslərə cəlb edilib.

Forumu işıqlandırmaq üçün 1000-dən çox akkreditə olunmuş media nümayəndəsi qeydiyyatdan keçib.

Quliyevin sözlərinə görə, forumun mühüm nəticələrindən biri Bakı Prinsiplərinin tətbiqinə dair Niyyət Məktubunun imzalanması olub.

“WUF13 göstərdi ki, XXI əsrdə şəhərlərin dayanıqlılığı və rəqabətqabiliyyətliliyi yalnız güclü beynəlxalq əməkdaşlıq və birgə fəaliyyət sayəsində təmin oluna bilər”, - Quliyev bildirib.

Gülnar Nazimqızı