Kitabxanaçların maaşı artırılacaq - nazir

Azərbaycanda dövlət kitabxana sisteminin optimallaşdırılması nəticəsində qənaət ediləcək resursların yenidən sahəyə yönəldilməsi və kitabxanaçıların əməkhaqlarının artırılması üçün konkret model hazırlanıb. Bunu mədəniyyət naziri Adil Kərimli kitabxana sisteminin inkişafına həsr olunmuş ictimai müzakirələrdə çıxışı zamanı deyib.

Nazirin sözlərinə görə, kitabxana sisteminin təkmilləşdirilməsində əsas prioritet insan amilidir və keyfiyyətli xidmətin təmin olunması üçün ilk növbədə kitabxanaçıların sosial rifahı yaxşılaşdırılmalıdır.

"Kitabxana sistemində çalışan şəxslərin əməyinin bazar tələblərinə uyğun qiymətləndirilməsi vacibdir. Bu istiqamətdə ciddi iş aparılır və artıq konkret model hazırlanıb", - nazir bildirib.

Adil Kərimli qeyd edib ki, sahənin əsas problemlərindən biri peşəkar kadr çatışmazlığıdır. Onun sözlərinə görə, hazırda kitabxana sistemində ali ixtisas təhsilli əməkdaşların payı cəmi 7,7 faiz təşkil edir, əməkdaşların 40 faizi isə yalnız ümumi orta təhsilə malikdir.

Nazir vurğulayıb ki, "Kitabxana işi haqqında" qanunda kitabxanalarda ixtisaslı kadrların fəaliyyət göstərməsi tələbi əksini tapsa da, uzun illər bu prinsipə tam əməl olunmayıb.

Nəticədə, sahəyə kifayət qədər bələd olmayan şəxslər də kitabxana sistemində fəaliyyət göstəriblər.

Bununla yanaşı, Adil Kərimli ölkədə peşəsinə böyük sevgi və fədakarlıqla yanaşan çoxsaylı kitabxanaçıların olduğunu bildirib.

"Ucqar rayonlarda belə, çətin şəraitdə çalışaraq kitaba və oxuculara xidmət edən insanlar var. Biz onları yüksək qiymətləndiririk və onların fəaliyyətini qorumağı vacib hesab edirik", - nazir qeyd edib.

Mədəniyyət naziri əlavə edib ki, 65 yaşdan yuxarı kitabxanaçıların yaş meyarına görə avtomatik şəkildə işdən uzaqlaşdırılması dövlətin məqsədi deyil.

Onun sözlərinə görə, bu məsələyə seçimli qaydada yanaşılır və əsas hədəf həm təcrübəli mütəxəssislərin potensialını qorumaq, həm də kitabxana sistemini peşəkar kadrlarla gücləndirməkdir.

Gülnar Nazimqızı