Azərbaycanda kraudfandinq fəaliyyəti üçün yeni qanun layihəsi hazırlanıb

Azərbaycanda kraudfandinq fəaliyyəti ilə bağlı yeni qanun layihəsi hazırlanıb.

Layihə ölkədə səhm və borc əsaslı kraudfandinqin həyata keçirilməsinin hüquqi, təşkilati və iqtisadi əsaslarını, kraudfandinq platforması operatorlarının fəaliyyətinə dair tələbləri, eləcə də bu sahədə dövlət tənzimlənməsi və nəzarət mexanizmlərini müəyyən edir.

Qanunun məqsədi startaplar, mikro, kiçik və orta sahibkarlar üçün alternativ maliyyələşmə kanallarına çıxışı genişləndirmək, kapital bazarının imkanlarından istifadəni artırmaq və investorların hüquqlarının müdafiəsini təmin etməkdir.

Layihəyə əsasən, kraudfandinq platformalarını idarə edən operatorlar yalnız Mərkəzi Bankın reyestrinə daxil edildikdən sonra fəaliyyət göstərə biləcəklər. Operatorların minimum nizamnamə və məcmu kapital tələbləri də Mərkəzi Bank tərəfindən müəyyən ediləcək.

Qanun layihəsində investorların vəsaitlərinin ayrıca uçotunun aparılması, onların operatorun aktivlərindən ayrı saxlanılması, fərdi investorlar üçün 7 günlük “düşünmə dövrü”nün tətbiqi və investisiya limitlərinin müəyyən edilməsi nəzərdə tutulur.

Sənədə görə, kraudfandinq kampaniyasının müddəti 90 gündən çox ola bilməz. Borc əsaslı kraudfandinq yalnız istiqraz buraxılışı, səhm əsaslı kraudfandinq isə səhmdar cəmiyyətləri tərəfindən əlavə səhmlərin buraxılması yolu ilə həyata keçiriləcək.

Kraudfandinq sahəsində tənzimləmə və nəzarət səlahiyyəti Mərkəzi Banka veriləcək. Qanun dərc olunduğu gündən 6 ay sonra qüvvəyə minəcək.

Gülnar Nazimqızı