Deputat: fırıldaqçılıq yolu ilə vətəndaşların adına şirkət açanlara qarşı nəzarət gücləndirilməlidir

Milli Məclisin deputatı Siyavuş Novruzov bildirib ki, qanunvericiliyin təkmilləşdirilməsi ilə yanaşı, sahibkarlıq fəaliyyətində sənədləşmə və nəzarət mexanizmləri gücləndirilməli, vətəndaşların adından qanunsuz şirkət yaradılması və maliyyə fırıldaqlarının qarşısı alınmalıdır.

Deputatın sözlərinə görə, sahibkarlar ilk növbədə qanunvericiliyin tələblərinə əməl etməli, biznes fəaliyyətini şəffaf şəkildə qurmalıdırlar. O qeyd edib ki, inkişaf etmiş ölkələrin təcrübəsində investisiya layihələri ciddi sənədləşmə və nəzarət mexanizmləri əsasında həyata keçirilir.

Novruzov bildirib ki, tikinti sektorunda da sənədləşmə işlərinin gücləndirilməsinə ehtiyac var. Onun sözlərinə görə, bəzi hallarda vətəndaşlardan vəsait toplanmasına baxmayaraq tikinti layihələri başa çatdırılmır, nəticədə insanlar zərər çəkirlər.

Deputat qanun layihəsində əksini tapan vətəndaşların şəxsiyyət vəsiqələrindən istifadə etməklə onların adlarına qanunsuz şirkətlər yaradılması hallarına da diqqət çəkib.

Onun sözlərinə görə, bəzi şəxslər vətəndaşların xəbəri olmadan onların adına şirkətlər qeydiyyatdan keçirir və sonradan həmin şəxslər iri məbləğdə vergi borcları ilə üzləşirlər.

"Bəzən vətəndaş yalnız vergi orqanından borc bildirişi aldıqda və ya ölkədən çıxmaq istəyərkən onun adına şirkət açıldığını öyrənir. Halbuki həmin şəxs sahibkarlıq fəaliyyəti ilə ümumiyyətlə məşğul olmayıb", - deputat bildirib.

Novruzov əlavə edib ki, internet resurslarından istifadə etməklə həyata keçirilən qanunsuz maliyyə əməliyyatları və kiberdələduzluq halları da ciddi narahatlıq doğurur. Onun fikrincə, pensiyaçıların və digər vətəndaşların bank hesablarından vəsaitlərin qanunsuz mənimsənilməsi hallarına qarşı hüquqi məsuliyyət sərtləşdirilməli, dövlət ilk növbədə vətəndaşların hüquqlarının qorunmasını təmin etməlidir.