İnterpolun axtardığı şəxs Monteneqrodan Azərbaycana ekstradisiya olunur

Baş Prokurorluğun sorğusu əsasında Monteneqro məhkəməsi Azərbaycan vətəndaşı Hidayət Süleymanovun ölkəyə ekstradisiyasına razılıq verib. Bu barədə Baş Prokurorluğun Mətbuat xidməti məlumat yayıb. 

Məlumata görə, Monteneqronun Ədliyyə Nazirliyinə göndərilmiş sorğu və beynəlxalq prosedurlara uyğun təqdim edilmiş sənədlər əsasında aparılan hüquqi prosesin nəticəsində Podqoritsa Ali Məhkəməsi Süleymanovun sadələşdirilmiş ekstradisiya proseduru ilə Azərbaycana təhvil verilməsi barədə qərar qəbul edib. 

Baş Prokurorluğun bildirdiyinə görə, Sumqayıt Şəhər Polis İdarəsində istintaq olunan cinayət işi üzrə Hidayət Süleymanov özünü vəzifəli şəxs kimi təqdim edərək zərərçəkmişə torpaq sahəsində ev tikintisi və dövlət orqanlarından icazələrin alınmasını təşkil edəcəyinə dair yalan vədlər verməklə dələduzluqda ittiham olunur. İstintaqın məlumatına əsasən, bu yolla zərərçəkmişə xeyli miqdarda maddi ziyan vurulub. 

Qurumun məlumatına görə, barəsində dələduzluq ittihamı irəli sürülən Süleymanov istintaqdan yayındığı üçün İnterpolun Bakıdakı Milli Mərkəzi Bürosu vasitəsilə beynəlxalq axtarışa verilib. O, keçirilmiş əməliyyat-axtarış tədbirləri nəticəsində Monteneqroda saxlanılıb. 

Hazırda onun Azərbaycana gətirilməsi istiqamətində Ədliyyə Nazirliyinin Penitensiar Xidməti tərəfindən müvafiq tədbirlər görülür.

Baş Prokurorluq əlavə edib ki, axtarışda olan şəxslərin xarici ölkələrdə müəyyən edilərək Azərbaycana gətirilməsi məqsədilə xarici tərəfdaş qurumlar, o cümlədən İnterpol ilə əməkdaşlıq davam etdirilir.