Fransada meşə yanğınları: daha 55 min nəfər təxliyə edilib

Fransada genişmiqyaslı meşə yanğınları səbəbindən daha altı yaşayış məntəqəsindən 55 min nəfər təxliyə edilib.

Fransanın daxili işlər naziri Loran Nunyes bildirib ki, bölgədə vəziyyət "çox əlverişsiz" olaraq qalır və yanğın "xaotik şəkildə Bordoya doğru irəliləyir".

Son bir həftə ərzində Fransa və İspaniya başda olmaqla bir sıra Avropa ölkələrində baş verən meşə yanğınları nəticəsində ümumilikdə 330 mindən çox insan təhlükəsiz ərazilərə köçürülüb.

Ən ağır vəziyyət Fransada qeydə alınıb. Burada alov 42 min hektar ərazini məhv edib ki, bu da İkinci Dünya Müharibəsindən bəri ölkədə baş vermiş ən böyük meşə yanğınlarından biri hesab olunur.

Rəsmi məlumatlara görə, ilin əvvəlindən Fransada ümumilikdə 98 min hektar ərazi yanıb. Quru hava şəraiti, bitki örtüyünün quruması və güclü külək yanğının sürətlə yayılmasına səbəb olub. Alovun təsiri nəticəsində İspaniyaya gedən A63 avtomobil yolunun 60 kilometrlik hissəsi bağlanıb.

İspaniyada da yanğınlar genişlənməkdə davam edir. Madrid və Avila ətrafındakı ərazilərdən 90 mindən çox sakin təxliyə olunub. Hakimiyyət orqanları, həmçinin Toledo yaxınlığındakı azı səkkiz yaşayış məntəqəsinin boşaldılması barədə göstəriş verib.

Madrid Muxtar İcmasının rəhbəri İzabel Dias Ayuso hadisəni "regionun tarixindəki ən dəhşətli yanğın" adlandırıb. İspaniyanın Baş naziri Pedro Sançes isə qarşıdakı günlərin "çətin keçəcəyini" bildirib.

Bu arada, şənbə gecəsi Valensiya yaxınlığında yeni yanğın ocağı yaranıb. Yerli hakimiyyət orqanları yanğın nəticəsində bir nəfərin öldüyünü təsdiqləyib.

Gülnar Nazimqızı