Sahibkarlardan 200 min manat rüşvət almaqda şübhəli bilinən iki vəzifəli şəxs həbs edilib

Dövlət Vergi Xidmətinin (DVX) iki vəzifəli şəxsi sahibkarlardan vergi yoxlamasının keçirilməməsi və cərimə tətbiq edilməməsi müqabilində rüşvət almaqda ittiham edilərək həbs olunub.

Bu barədə Baş Prokurorluq yanında Korrupsiyaya qarşı Mübarizə Baş İdarəsi və İqtisadiyyat Nazirliyi yanında Dövlət Vergi Xidmətinin birgə məlumatında bildirilir.

Məlumata görə, Dövlət Vergi Xidmətindən daxil olmuş materiallar əsasında Baş Prokuror yanında Korrupsiyaya qarşı Mübarizə Baş İdarəsində araşdırma aparılıb və Cinayət Məcəlləsinin müvafiq maddələri ilə cinayət işi başlanıb.

İlkin istintaqla müəyyən edilib ki, DVX-nin Bakı şəhəri Operativ Vergi Nəzarəti və Uçotun Təşkili Baş İdarəsinin Sahə Təhkimçiliyi İdarəsinin rəis müavini Rüstəm Mirzəyev və həmin idarənin 4-cü şöbəsinin rəisi Kənan Məmmədov 2026-cı ilin may ayında Bakıda yerləşən ticarət mərkəzlərindən birində fəaliyyət göstərən çoxsaylı sahibkarlardan vergi yoxlamalarının aparılmaması, cərimələrin tətbiq edilməməsi və digər məqsədlərlə ümumilikdə 200 min manat rüşvət almaqda şübhəli bilinirlər.

Toplanmış sübutlar əsasında hər iki şəxsə Cinayət Məcəlləsinin 311.3.1 və 311.3.3-cü maddələri (qabaqcadan əlbir olan bir qrup şəxs tərəfindən külli miqdarda rüşvət alma) ilə ittiham irəli sürülüb. Binəqədi Rayon Məhkəməsinin qərarı ilə onların barəsində həbs qətimkan tədbiri seçilib.