İcbari sığorta tələbi 10 hektardan 7 hektara endirilib

Aqrar Subsidiya Şurası tərəfindən aqrar sığorta ilə bağlı yeni qərarlar qəbul edilib. Qərarlar həm Aqrar Sığorta Fondu, həm də fermerlər üçün bir sıra yenilikləri nəzərdə tutur.

Bunu Aqrar Sığorta Fondunun İdarə Heyətinin sədr müavini Ləman Əliyeva-Məmişova jurnalistlərə açıqlamasında deyib.

Onun sözlərinə görə, yeni qərara əsasən, icbari sığortalanma tələbi tətbiq olunan bitkilərin siyahısı genişləndirilib. Belə ki, arpa, buğda, qarğıdalı və çəltiklə yanaşı, günəbaxan da icbari sığortalanmalı bitkilərin sırasına əlavə edilib.

Bununla yanaşı, icbari sığorta tələbinin tətbiq olunduğu əkin sahəsinin minimum ölçüsü 10 hektardan 7 hektara endirilib.

Ləman Əliyeva-Məmişova bildirib ki, qərarın əsas məqsədi aqrar sığortanın fermerlər üçün daha əlçatan olmasını və sığortalanmanın əhatə dairəsinin genişləndirilməsini təmin etməkdir.

“Yeni qərara əsasən, daha xırda və ortaölçülü təsərrüfatların da Aqrar Sığortaya əlçatanlığı artacaq. Onların risklərdən qorunması təmin ediləcək”, – deyə Fond rəsmisi qeyd edib.

O, həmçinin günəbaxan bitkisinin sığorta təminatına əlavə edilməsinin mühüm yenilik olduğunu vurğulayıb.

“Günəbaxan iqlim risklərinə həssas bitkilərdən biridir. Bu bitkinin sığorta təminatına daxil edilməsi həmin sahədə fəaliyyət göstərən fermerlərin maliyyə itkilərinin qarşısının alınmasına və maliyyə dayanıqlığının təmin edilməsinə böyük rol oynayacaq”, – Ləman Əliyeva-Məmişova bildirib.

Fond rəsmisi həmçinin yeni salınmış bağlarla bağlı sığortalanma tələbinin 3 illik müəyyən edilməsini mühüm dəyişiklik kimi qiymətləndirib.

Onun sözlərinə görə, yeni salınmış bağın iqtisadi dəyərini formalaşdırması və məhsula düşməsi təxminən üç il çəkir. İlk üç il bağlar üçün ən riskli dövr hesab olunur. Bu müddətdə fermer hələ məhsul və gəlir əldə etmədiyindən, üç illik sığorta tələbinin tətbiqi onun qoyduğu sərmayənin qorunması baxımından əhəmiyyətlidir.

Aytac