Azərbaycanda müəllimlərin geyimi ilə bağlı yeni tələblər yaxın günlərdə açıqlanacaq - nazir

Azərbaycanda dövlət məktəblərində çalışan müəllimlərin geyimi ilə bağlı yeni qaydalar yaxın günlərdə tətbiq ediləcək. Bunu elm və təhsil naziri Emin Əmrullayev bildirib.

Nazir qaydaların müəllimlər üçün eyni modeldə vahid geyim formasının tətbiqini nəzərdə tutmadığını, əsas məqsədin onların xarici görünüşünə dair ümumi tələbləri müəyyənləşdirmək olduğunu deyib.

Yeni tələblərin detalları, tətbiq mexanizmi və qaydalara əməl olunmasına nəzarətin hansı formada həyata keçiriləcəyi hələ açıqlanmayıb.
Azərbaycan parlamenti iyulda “Ümumi təhsil haqqında” qanuna dəyişiklik edərək dövlət ümumi təhsil müəssisələrində çalışan müəllimlərin geyiminə dair tələblərin aidiyyəti dövlət qurumu tərəfindən müəyyənləşdirilməsinə hüquqi əsas yaradıb. Dəyişikliklər müəllimlərlə yanaşı, şagirdlərin mövcud geyim qaydalarına əməl etməsini də tələb edir. 

Məktəbəqədər və Ümumi Təhsil üzrə Dövlət Agentliyi sentyabrın əvvəlində müəllimlərin geyiminə dair tələblərin və onların tətbiq mexanizmlərinin hazırlandığını, sənəd təsdiqləndikdən sonra ictimaiyyətə məlumat veriləcəyini bildirmişdi. 

Əmrullayev 2025-ci ilin sentyabrında müəllimlərin etik davranış qaydalarında onların geyiminə dair tövsiyələrin olduğunu, lakin vahid formaya keçidin nəzərdə tutulmadığını demişdi.

Gülnar