Azərbaycanda sağlamlıq və müalicə yerləri ilə bağlı ayrıca qanunun qəbulu təklif edilir

Azərbaycanda təbii müalicə ehtiyatları, sağlamlıq və müalicə yerlərinin fəaliyyətinin hüquqi tənzimlənməsi üçün ayrıca qanunun qəbul edilməsi təklif olunub. Bu təkliflə Milli Məclis Aparatının Sosial qanunvericilik şöbəsinin müdiri Adil Vəliyev çıxış edib.

Onun sözlərinə görə, Azərbaycan tərəfinin hazırladığı “Sahilyanı sağlamlıq və müalicə yerləri haqqında” model qanun layihəsi TÜRKPA-nın müvafiq komissiyasından keçib və sənədin oktyabrda keçiriləcək plenar iclasda qəbul olunması gözlənilir.

Vəliyev model qanun qəbul edildikdən sonra onun müddəalarının Azərbaycanın milli qanunvericiliyinə daxil edilməsini təklif edib.
“Azərbaycan təbii müalicə ehtiyatlarının zənginliyi, rəngarəngliyi və unikallığı ilə seçilir. Ölkədə dəniz, göllər, çaylar, palçıq vulkanları, duz yataqları, müalicəvi mineral sular və minlərlə su mənbəyi var. Lakin bu sahə ilə bağlı anlayışlar hələ milli qanunvericilikdə əksini tapmayıb”, - o bildirib.

Vəliyevin sözlərinə görə, model qanun layihəsinin hazırlanması yeddi aydan çox davam edib. O qeyd edib ki, bu sahədə fundamental hüquqi bazanın olmaması sənədin hazırlanmasını çətinləşdirib.

“Azərbaycan zəngin təbii ehtiyatlarına və müalicə-sağlamlaşdırma imkanlarına görə bu məsələlərin hüquqi tənzimlənməsini aparmalıdır”, - Vəliyev deyib.
Gülnar Nazimqızı