Metro və dəmir yolu layihələri üçün torpaqların dövlət ehtiyacları ilə alınması qaydaları dəyişdirilir

Azərbaycanda metro və dəmir yolu infrastrukturu üzrə strateji layihələrin icrasını sürətləndirmək məqsədilə torpaqların dövlət ehtiyacları üçün alınması ilə bağlı qanunvericiliyə dəyişiklik təklif olunur.

Hazırlanan qanun layihəsi ilə Azərbaycan Respublikasının Mülki Məcəlləsinə və “Torpaqların dövlət ehtiyacları üçün alınması haqqında” Qanuna dəyişiklik edilməsi nəzərdə tutulur.

Layihəyə əsasən, tunellər, o cümlədən metro tunelləri, dəmir yolu və metropoliten xətləri, stansiyalar və depoların tikintisi, bərpası və təkmilləşdirilməsi üçün zəruri torpaq sahələrinin dövlət ehtiyacları üçün alınması üzrə hüquqi mexanizmlərin dəqiqləşdirilməsi təklif edilir.

Dəyişikliklərin ölkə üzrə mühüm nəqliyyat və kommunikasiya layihələrinin, xüsusilə metro və dəmir yolu infrastrukturunun genişləndirilməsinin sürətləndirilməsinə, torpaqların alınması prosesində hüquqi müəyyənlik və şəffaflığın təmin edilməsinə yönəldiyi bildirilir.

Prezident İlham Əliyevin 30 yanvar 2025-ci il tarixli sərəncamı ilə “Bakı şəhərində və ətraf ərazilərdə nəqliyyat infrastrukturunun təkmilləşdirilməsinə dair 2025–2030-cu illər üçün Dövlət Proqramı” təsdiqlənib. Proqram çərçivəsində yeni depoların, stansiyaların və xətlərin tikintisi, eləcə də mövcud infrastrukturun bərpası və təkmilləşdirilməsi nəzərdə tutulur.

Gülnar Nazimqızı